दुर्गा टेम्पल ऑफ वेस्टचेस्टरच्या सांस्कृतिक सोहळ्यात पंडित प्रणब कुमार बिस्वास यांचे सुरेल गायन; तबल्यावर पंडित आदित्य नारायण बॅनर्जी यांची अप्रतिम साथ
(SDNA) वेस्टचेस्टर काउंटी, न्यूयॉर्क : भारतीय संगीताचा समृद्ध वारसा आणि सांस्कृतिक परंपरेचा सुरेल आविष्कार अमेरिकेतील न्यूयॉर्क येथे अनुभवायला मिळाला. दुर्गा टेम्पल ऑफ वेस्टचेस्टर यांच्या वतीने शनिवार, २४ ऑक्टोबर २०२६ रोजी आर्ड्सले कम्युनिटी सेंटर येथे विशेष संगीत संध्याचे आयोजन करण्यात आले होते. या कार्यक्रमाला परिसरातील भारतीय नागरिक, संगीतप्रेमी आणि अनेक कुटुंबांनी उत्स्फूर्त प्रतिसाद दिला.
या संगीत सोहळ्याचे प्रमुख आकर्षण होते प्रख्यात गायक पंडित प्रणब कुमार बिस्वास यांचे गायन. त्यांच्या सुरेल सादरीकरणाला पंडित आदित्य नारायण बॅनर्जी यांनी तबल्याची प्रभावी साथ दिली. नील नाडकर्णी यांनी की-बोर्ड, तर चैतन्य शेलार यांनी गिटारच्या माध्यमातून संगीताच्या मैफलीत वेगळी रंगत आणली.
कार्यक्रमात हिंदुस्थानी शास्त्रीय संगीत, उपशास्त्रीय गायन, गझल, भावपूर्ण गीतांसह लोकप्रिय बॉलीवूड गाण्यांचीही मेजवानी रसिकांना अनुभवायला मिळाली. पारंपरिक भारतीय संगीत आणि आधुनिक वाद्यांचा सुरेख मिलाफ यामुळे संपूर्ण वातावरण संगीतमय झाले. कलाकारांच्या सादरीकरणाला उपस्थितांनी मनापासून दाद दिली.
विशेष म्हणजे, हा कार्यक्रम केवळ मनोरंजनापुरता मर्यादित न राहता परदेशात भारतीय कला, संस्कृती आणि संगीतपरंपरेचे जतन करण्याचा एक महत्त्वपूर्ण प्रयत्न ठरला. वेस्टचेस्टर काउंटी तसेच आसपासच्या भागांतून आलेल्या भारतीय समुदायाला एकत्र येण्याची आणि आपल्या सांस्कृतिक मुळांशी पुन्हा जोडले जाण्याची संधी या निमित्ताने मिळाली.
कार्यक्रमाच्या यशस्वितेसाठी दुर्गा टेम्पल ऑफ वेस्टचेस्टरच्या व्यवस्थापनाने सर्व कलाकार, स्वयंसेवक, प्रायोजक आणि सहकार्य करणाऱ्या व्यक्तींचे आभार मानले. अशा सांस्कृतिक उपक्रमांमुळे भारतीय परंपरा नव्या पिढीपर्यंत पोहोचण्यास मदत होते, तसेच परदेशातील भारतीय समुदायामध्ये सांस्कृतिक एकात्मता आणि परस्परांतील स्नेह अधिक दृढ होतो, अशी भावना आयोजकांनी व्यक्त केली.
भारतीय संगीताच्या विविध रंगांनी नटलेली ही संध्याकाळ उपस्थित रसिकांसाठी अविस्मरणीय ठरली. परदेशातही भारतीय संस्कृतीचा सुगंध आणि संगीताचा वारसा तितक्याच उत्साहाने जपला जात असल्याचे या कार्यक्रमातून पुन्हा अधोरेखित झाले. (SDNA)
