पुण्यात भक्तामर दिनाचा ऐतिहासिक सोहळा! हजारो श्रावक-श्राविकांचे ९ मिनिटे ९ सेकंद सामूहिक भक्तामर अनुष्ठान; भक्तामर आगाज़-२ उत्साहात संपन्न
पुण्यात कोथरूड येथील पंडित फार्म येथे आंतरराष्ट्रीय भक्तामर दिना निमित्त भक्तामर आगाज़-२ सोहळा उत्साहात संपन्न.आचार्य श्री १०८ प्रणामसागरजी महाराज यांच्या प्रेरणेने हजारो श्रावक- श्राविकांचे सामूहिक भक्तामर अनुष्ठान,मंजू जैन यांना भक्तामर प्रभावना पुरस्कार आणि चार पुस्तकांचे प्रकाशन.
पुण्यात भक्तीचा ऐतिहासिक जागर! हजारो जैन बांधवांनी एकसुरात केले भक्तामर अनुष्ठान
पुणे | ज्ञानप्रवाह न्यूज, दि.९ ऑक्टोबर २०२६ :आंतरराष्ट्रीय भक्तामर दिनानिमित्त पुण्यातील कोथरूड येथील पंडित फार्म येथे आध्यात्मिक सोहळ्याचे आयोजन करण्यात आले.विश्वसंत भक्तामरवाले बाबा डॉ.आचार्य श्री १०८ प्रणामसागरजी महाराज यांच्या प्रेरणेने व मार्गदर्शनाखाली आयोजित करण्यात आलेला भक्तामर आगाज़ -२ हा सोहळा श्रमणोपाध्याय श्री १०८ विभंजनसागरजी गुरुदेव यांच्या पावन सान्निध्यात उत्साहात संपन्न झाला.हजारो जैन श्रावक- श्राविकांनी एकत्र येत भक्तामर स्तोत्राचे सामूहिक अनुष्ठान केले.भक्ती,श्रद्धा,आध्यात्मिक साधना आणि धार्मिक संस्कारांचा अनोखा संगम या कार्यक्रमातून अनुभवायला मिळाला.
९ ऑक्टोबर, ९ मिनिटे आणि ९ सेकंदांचा आध्यात्मिक संकल्प
या सोहळ्याचे सर्वांत महत्त्वाचे आकर्षण म्हणजे ९ ऑक्टोबर रोजी ९ मिनिटे ९ सेकंदांच्या निर्धारित कालावधीत करण्यात आलेले सामूहिक भक्तामर अनुष्ठान. हजारो श्रद्धाळूंनी एकाच वेळी भक्तामर स्तोत्राचे पठण करून भक्ती आणि साधनेचा सामूहिक संकल्प केला. भक्तामर स्तोत्राच्या मंत्रोच्चारांनी संपूर्ण परिसर भक्तिमय झाला.
हा उपक्रम केवळ धार्मिक विधीपुरता मर्यादित न राहता श्रद्धा, आत्मविश्वास,आध्यात्मिक जागृती आणि समाजातील एकात्मतेचा संदेश देणारा ठरला. मोठ्या संख्येने सहभागी झालेल्या भाविकांच्या उपस्थितीमुळे सोहळ्याला विशेष महत्त्व प्राप्त झाले.
भक्तामर आगाज़-२ मध्ये विविध मंदिरांचे सांस्कृतिक कार्यक्रम
आंतरराष्ट्रीय भक्तामर दिनानिमित्त आयोजित या सोहळ्यात विविध मंदिरांच्या वतीने सांस्कृतिक कार्यक्रम सादर करण्यात आले. या कार्यक्रमांमधून जैन धर्मातील आध्यात्मिक विचार,धार्मिक परंपरा, संस्कार आणि सामाजिक एकतेचे महत्त्व अधोरेखित करण्यात आले. विविध मंदिरांचा सहभाग आणि देशाच्या वेगवेगळ्या भागांतून आलेल्या साधकांची उपस्थिती हे या सोहळ्याचे प्रमुख वैशिष्ट्य ठरले.
मान्यवरांच्या उपस्थितीने सोहळ्याची शोभा वाढली
या कार्यक्रमाला भारत सरकारच्या जैन अल्पसंख्याक आर्थिक विकास महामंडळाचे अध्यक्ष राज्यमंत्री दर्जा प्राप्त ललित गांधी यांच्यासह अरविंद जैन,अचल जैन,राजेंद्र बाठिया,प्रवीण चोरबोले,ॲड.एस. के.जैन, विलास राठोड, अनिल गेलडा, किशोर शाह सराफ आणि अतुल काका सराफ आदी मान्यवर उपस्थित होते.
याशिवाय अहमदाबाद येथील अमरीश मेहता,नागपूर येथील मंजू जैन, चेन्नई येथील सरिता जैन आणि सोनल जयस्वाल यांच्यासह देशाच्या विविध भागांतून आलेले भक्तामर हीलर्स आणि भक्तामर साधक या आध्यात्मिक सोहळ्यात सहभागी झाले.
मंजू जैन यांना भक्तामर प्रभावना पुरस्कार
भक्तामर स्तोत्राचा प्रसार आणि त्याच्या प्रभावनेच्या कार्यातील योगदानाबद्दल नागपूर येथील श्रीमती मंजू जैन यांना भक्तामर प्रभावना पुरस्कार प्रदान करून सन्मानित करण्यात आले. भक्तामर साधनेचा संदेश अधिकाधिक लोकांपर्यंत पोहोचविण्यासाठी कार्य करणाऱ्यांचा गौरव करण्याच्या दृष्टीने हा सन्मान महत्त्वपूर्ण ठरला.
स्वस्तिश्री स्वामी डॉ.जयेंद्रकीर्तीजी यांना भट्टारक पदवी
सोहळ्यातील आणखी एक महत्त्वाचा प्रसंग म्हणजे उज्जैन येथील स्वस्तिश्री स्वामी डॉ. जयेंद्रकीर्तीजी यांना भट्टारक पदवी प्रदान करून गौरविण्यात आले. या धार्मिक सन्मानामुळे कार्यक्रमाच्या आध्यात्मिक महत्त्वात भर पडली.
भक्तामर स्तोत्रावरील चार पुस्तकांचे प्रकाशन
कार्यक्रमादरम्यान मान्यवरांच्या हस्ते भक्तामर स्तोत्रावरील चार पुस्तकांचे प्रकाशन करण्यात आले. भक्तामर स्तोत्राचे आध्यात्मिक महत्त्व, त्यातील विचार आणि साधनेचा संदेश वाचकांपर्यंत पोहोचविण्याच्या दृष्टीने हा उपक्रम महत्त्वाचा मानला जात आहे. धार्मिक साहित्याच्या माध्यमातून नव्या पिढीला संस्कार आणि आध्यात्मिक विचारांची ओळख करून देण्याचा संदेशही या उपक्रमातून देण्यात आला.
स्वागत,प्रास्ताविक आणि आयोजनात कार्यकर्त्यांचे योगदान
कार्यक्रमाचे स्वागत स्वप्निल पाटणी यांनी केले.प्रास्ताविक मिलिंद फडे यांनी केले.या सोहळ्याच्या नियोजनासाठी मनीष जैन,शीतल लोहाडे, सुजाता शाह,विनय चुडीवाल,सुरेंद्र बडजात्या, कल्याण गंगवाल,अभय पाटील, रितेश जैन,वीरकुमार शाह, अभय कोठारी, ममता जैन, प्रीतम मेहता, रवी कसलीवाल, देशभूषण डुड्डू, संतोष नवले, अजित पांढरे आणि सुकुमाल जैन आदी कार्यकर्त्यांनी विशेष परिश्रम घेतले. सर्वांच्या सामूहिक प्रयत्नांतून कार्यक्रमाचे नियोजन आणि आयोजन यशस्वीरीत्या पार पडले.
भक्ती,संस्कार आणि सामाजिक एकतेचा प्रेरणादायी संदेश
भक्तामर आगाज़-२ हा सोहळा धार्मिक आयोजनासोबतच भक्ती, संस्कृती, ज्ञान, संस्कार आणि सामाजिक एकात्मतेचा उत्सव ठरला. हजारो श्रावक-श्राविकांचा सहभाग, मान्यवरांची उपस्थिती, पुरस्कार वितरण,धार्मिक पदवी प्रदान आणि पुस्तक प्रकाशन अशा विविध उपक्रमांमुळे या कार्यक्रमाला व्यापक स्वरूप प्राप्त झाले.
आचार्य श्री १०८ प्रणामसागरजी महाराज यांच्या प्रेरणा व मार्गदर्शनाने आणि श्रमणोपाध्याय श्री १०८ विभंजनसागरजी गुरुदेव यांच्या पावन सान्निध्यात पार पडलेल्या या सोहळ्याने भक्तामर साधनेच्या प्रसाराचा संदेश दिला. धार्मिक संस्कार पुढील पिढ्यांपर्यंत पोहोचविणे, समाजात आध्यात्मिक जागृती वाढविणे आणि एकतेची भावना दृढ करणे हा या आयोजनाचा प्रमुख उद्देश अधोरेखित झाला.
९ ऑक्टोबर रोजी ९ मिनिटे ९ सेकंदांच्या सामूहिक अनुष्ठानातून हजारो भाविकांनी भक्ती आणि साधनेचा संकल्प व्यक्त केला. त्यामुळे पुण्यातील हा सोहळा जैन समाजासाठी श्रद्धा, आध्यात्मिक साधना आणि सामूहिक सहभागाचा महत्त्वपूर्ण प्रसंग ठरला.
