मंगळवेढ्यात ४५ गावांतील पशुपालक संकटात; १,३५० शेतकऱ्यांचा इशारा, आठ दिवसांत चारा द्या अन्यथा रास्ता रोको
मंगळवेढा तालुक्यातील दुष्काळ ग्रस्त ४५ गावांमध्ये जनावरांसाठी तातडीने चारा व पाणी उपलब्ध करावे अन्यथा आठ दिवसांत रास्ता रोको आंदोलन करू, असा इशारा १,३५० दूध उत्पादक शेतकऱ्यांनी निवेदनाद्वारे दिला.
मंगळवेढा | ज्ञानप्रवाह न्यूज :सोलापूर जिल्ह्यातील मंगळवेढा तालुक्यातील दुष्काळाची तीव्रता अधिक असलेल्या ४५ गावांमध्ये जनावरांसाठी तातडीने चारा आणि पाणी उपलब्ध करून द्यावे, अन्यथा आठ दिवसांनंतर भव्य रास्ता रोको आंदोलन करण्यात येईल, असा इशारा दूध उत्पादक शेतकऱ्यांनी प्रशासनाला दिला आहे.कृषिभूषण अंकुश पडवळे यांच्या नेतृत्वाखालील शिष्टमंडळाने तहसीलदारांचे प्रतिनिधी तथा पुरवठा निरीक्षक नवनाथ चव्हाण यांच्याकडे बुधवार दि.१४ ऑक्टोबर लेखी निवेदन सादर केले.या निवेदनावर १,३५० शेतकऱ्यांच्या सह्या आहेत.
४५ गावांमध्ये चारा टंचाईची तीव्रता
मंगळवेढा तालुक्याच्या दक्षिण भागात दुष्काळाची तीव्रता वाढली असून अनेक गावांमध्ये जनावरां साठी चारा उपलब्ध होणे कठीण झाले आहे. मागील तीन ते चार महिन्यांपासून पशुपालक शेतकरी जनावरांना जगवण्यासाठी विकतचा चारा आणत आहेत. मात्र, सतत चारा खरेदी करण्याची आर्थिक क्षमता आता संपत चालली असल्याचे शेतकऱ्यांनी निवेदनात नमूद केले आहे.
शासनाने दुष्काळ जाहीर केला असला तरी दुष्काळी उपाय योजनांचा प्रत्यक्ष लाभ पशुपालकां पर्यंत पोहोचत नसल्याची तक्रार शेतकऱ्यांनी केली आहे. जनावरां साठी चारा आणि पाण्याची तातडीने व्यवस्था करणे आवश्यक असताना संबंधित गावांमध्ये अद्याप पुरेसा पुरवठा झालेला नसल्याचे त्यांनी म्हटले आहे.
८० दिवसांचा चारा शिल्लक असल्याच्या दाव्यावर प्रश्न
प्रशासनाकडून अद्याप ८० दिवसांचा चारा शिल्लक असल्याचे सांगितले जात असल्याचा उल्लेख निवेदनात करण्यात आला आहे. मात्र ज्या गावांमध्ये चारा संपला आहे, त्या गावांची प्रत्यक्ष पाहणी करून वस्तुस्थिती तपासावी आणि तातडीने चारा उपलब्ध करून द्यावा,अशी मागणी दूध उत्पादकांनी केली आहे.
जिल्हाधिकारी आणि तहसीलदार यांनी दुष्काळग्रस्त ४५ गावांना प्रत्यक्ष भेट देऊन चाऱ्याच्या उपलब्धतेची खातरजमा करावी, अशी मागणीही करण्यात आली आहे.
आठ दिवसांची मुदत;अन्यथा तीव्र आंदोलन
शासनाने पुढील आठ दिवसांत जनावरांसाठी चारा आणि पाण्याची व्यवस्था करावी. अन्यथा मंगळवेढा तालुक्यातील पशुपालक शेतकऱ्यांच्यावतीने भव्य रास्ता रोको आंदोलन करण्यात येईल, असा स्पष्ट इशारा निवेदनातून देण्यात आला आहे.
चारा आणि पाणी उपलब्ध न झाल्यास दुष्काळाची तीव्रता असलेल्या ४५ गावांतील शेतकरी आपल्या जनावरांसह स्थलांतर करण्यास बाध्य होऊ शकतात. त्यामुळे शासन आणि प्रशासनाने या गंभीर परिस्थितीची तातडीने दखल घ्यावी, असे शेतकऱ्यांनी म्हटले आहे.
कृषिभूषण अंकुश पडवळे यांच्या नेतृत्वाखालील शिष्टमंडळात अशोक लेंडवे, औदुंबर गायकवाड, दामाजी सलगर, श्रीपती चौगुले, शहाजान पटेल, आबासाहेब पाटील, संजय काकडे, राजश्री जगदाळे, यशवंत सलगर आणि राहुल चौगुले यांच्यासह इतर प्रतिनिधी उपस्थित होते.यावेळी १,३५० शेतकऱ्यांच्या सह्यांचे निवेदन प्रशासनाकडे सादर करण्यात आले.
शेतकऱ्यांच्या स्थलांतराची वाट पाहत आहे का शासन ?
मंगळवेढा तालुक्यातील ४५ गावांमध्ये दुष्काळाची भीषण परिस्थिती आहे. जिल्हाधिकारी आणि तहसीलदार यांनी या गावांमध्ये प्रत्यक्ष येऊन पाहणी करावी. त्यामुळे ८० दिवसांचा चारा शिल्लक आहे की त्यापूर्वीच चारा संपला आहे, हे स्पष्ट होईल. शासन दूध उत्पादक शेतकऱ्यांच्या स्थलांतराची वाट पाहत आहे का ? असा सवाल कृषिभूषण अंकुश पडवळे यांनी उपस्थित केला.
